教育部115年7月的臺灣台語認證考試，對這馬就開始報名，時間到5月初8下晡5點，無限定身份，凡若有興趣的人，攏通對線頂報名。另外嘛歡迎逐家相招來報團體組，予恁兩人就通敆一團，閣再若攏報仝卷，咱會優先共恁排佇仝一間學校考，予恁有伴省得閣相揣，一好佮一gâi若甲是世間代，咱干干仔就兩好欲來相安排。115年7月這場的考試分兩工考兩卷。7月25（拜六）先考A卷；B卷就7月26（禮拜）才來考。考試報名費250箍，若19歲以下的咱特別sa̋-bì-sù免抾錢。測驗所有的項目（聽、講、讀、寫4項）若攏有考齊著的，咱猶有攢1份紀念品欲來相送。

　嘛著特別提醒考生的是，明年A、B、C三卷考試攏齊改做「電腦化測驗」（其中書寫測驗原在用紙筆作答）。閣再，猶未讀冊的細漢囡仔（6歲以下）抑是歲頭較濟（65歲以上）的人若欲考A卷，家己自覺欲改用電腦考試加減會有困難的，嘛通申請特殊服務，詳細說明請看刊佇考試網站頂懸的簡章內容。電腦化考試對考生敢會齊合路？教育部都也真猛醒，萬項替咱考慮甲到到到，今嘛有佇認證考試網站的「自學資源」專區，設一个「電腦化測驗線頂模擬平台」，歡迎考生才較捷來試用看覓咧，予咱通冗早適應。

　另外，除了考試方式改用電腦測驗，考生的成績若是達到各級的通過標準，115年開始會改寄電子證書。無紙化毋但是環保，也省去寄送的時間，閣再考生嘛免驚證書會拍無抑是各樣去，予咱省事事省，嘛免驚證書會有假包，咱政府也有設「教育部電子證書驗證系統」通查證。

　有關考試的資訊，攏有共刊佇認證考試的網站矣，佇「最新消息」遐就查會著。若猶有其他考試相關的問題，才請聯絡承辦單位國立臺灣師範大學。電話服務專線：(02)7749-9511；嘛有服務信箱：ttg.sce@deps.ntnu.edu.tw。